المجبر: رجال دين قلوب سودا متل توابن

أسوأ ما في قلوب رجال الدين إنن بيتسامحـــوا مع فساد السلطة ب الجمهورية اللبنانية والأضرب إنن ما بيتغاضـوا عن ظلم شعبن إللي عم بيرزح تحت الفقر والهجرة والحرمان والدمار والحروب . كل عمرو دورن بيلعب العامل الحاسم المساعد للتخلف اللي ضرب طنابو بالجمهورية وما حدا يقلنا “عيب ” عيب ع يلي بيعمل عيب ، وعيب ع يلي بيشخط ولد مش قادرين إهلو يدفعوا القسط إللي بها الإيام بيكوي كوي … عيب ع رجل دين بيحتفظ بمساعدات وببيعها خارج البلاد ، وما حدا يطلع ويقول برهنوا ه الأمر ، راجعوا التلفزيونات بوقت ال كورنا وين صارت المساعدات بالدول المجاورة .

أسوأ ما في قلوب رجال الدين الدكتاتورية بالمواقف شعبن رح يموت من الذل وهني ع المذابح والمنابر بيكبوا حكي ليوم الحكي وكل حكيّن بلا طعمي ، وجع الشعب مش همن ، جوع الشعب مش همن ، تهجير الشعب مش همن ، قتل الأطفال والأبرياء مش همن ، السلاح الغير شرعي إللي سبب العفن السياسي منو همن ، كل مواقفن ملياني إلتباس وذل وعار وخياني .

عارن وذلن بلّش يظهر ع سطح الحقيقة ، بيدّعوا إنو هني مع مصالح شعبن ، وهني عن يحافظوا عن تواريخ شعوبن ، وهني عن يمارسوا الدياني عن قناعة ، والظاهر إنو ه الممارسة هيي عن تجارة صرف ، وخلي حدا يخبرني عن الاوقاف وخلي حدا يخبرني عن حدايق الأعراس ، وخلي حدا يخبرني عن السهرات … هل هني مقتنعين برسالتن السماويي اللي آخدين الله والقديسين ع ميلة نبش المصاري من جيوب الناس … معقول إذا بدكن تزورا كنيسي أو مسجد بدكن تحطوا مصاري بالقلاية ، خيي بركي فقير وما معي فلوس ما إلي فوت ع بيت الله ، مين توّبوا بإسمك ت تستغلوا بها الطريقة ؟!!

رجال دين نوع من البضاعة المزاجيي وما حدا من العالم قدر يفهم طريقة تفكيرن وتصرفاتن ، والأنكى أغلبيتهم بيمارسوا ع شعبن الأساليب الملتوية والأنكى بيبكوا قدام العامة وبينكروا جرمن من دم ه الصديق إللي جوعان وعريان ، وينك يا ربي طل وشوف شو صاير بشعبك المنتوف ؟؟؟ ولكْ في إلكن قلب تستغلّوا عوذ الأرامل واليتامى والمرضى مقابل التلّطي وراء عدم إمكانية المساعدة ، وين الأموال إللي عن تجي من جمعيات من الخارج ويلي جايي خصيصًا ل ه المعترين المقهورين المظلومين إنتو كفار بإمتياز .

رحتوا ع روما ت تتصوروا مع البابا ، وبمناسبة تطويب الإخوة المسابكيين ، سألت ربي أنا وعن صلي وردية الصبح “أولك يا ربي ه الرايحين حتى يقدسوا ه الشهدا عارفين معنى شهادتن ؟ عارفين إنو هني قديسين بدون جميلتن ؟ عارفين إنو عظامون رفع تفرع بالقبور من رجس أفعالن وأقوالن ؟ عارفين إنو الشهادي والقداسي منن براء ؟ عارفين إنو ه الرهبان ما بيشرفن رجال دين من ه المستوى ؟ شو باك مش عن تجاوب يا ربي ؟ بعرف إني سألت سؤال عن ناس إنت دايما مزعوج منن ومن تصرفاتن ، وبعرف إنك سموح وغفور … بس يا بيي ما بئا تغفر لهيك رجال دين ، إنتْ شاهد ع يلي عم بيصير فينا … إرحمنا يار رب وخلصنا .

يا رب إنتْ إللي رفعت الشرور عن شعبك ، إنتْ إللي إفتديت شعبك بالموت والقيامي ، إنتْ إللي شفيت المرضى ، إنت إللي قوّمت الموتى ، إنت إللي صوّبت مع الرسل الأديان ، إنتْ إللي قلتلنا إعبدوا رب واحد لا ربين ، وما تعبدوا المال ، هودي إللي فايتين بكارك وبيستغلوا إسمك خربونا ضربونا شردونا جوّعونا قتلونا فرّقونا …

أمرن يا رب بالطاعة وخليّن يرجعوا لطريق الخلاص طريق الرحمي المحبي الحنيي ، وإلاّ دركبن ع جهنم وخلصنا منن لأنو تعبنا وما عاد فينا  نحمل … يا رب هودي رجال دين أصحاب قلوب سودا متل توابن ، كان توبك توب الطهارة رد الطهارة ع قلوبن لأنو صاروا كلن متل قيافا وعبايتو … بشكرك يا رب سمحتلي إحكيك وبوعدك رح ضل صلي الوردية .